മൊബൈലോഗ്രാഫി Mobile Photography

             

              ഓ...ഒരു SLR. പോക്കറ്റിലും ഇടാന്‍ കഴിയില്ല,മുടിഞ്ഞ വെയിറ്റും.എന്‍റെ മൊബൈല്‍ ക്യാമറ തന്നെ ധാരാളം.പക്ഷേ എങ്ങനാ ഇതിന്‍റെ കാര്യങ്ങളൊന്നു പഠിക്ക്യാ.എല്ലാ ഫോട്ടോഗ്രഫി ക്ലാസ്സുകളും SLRറിനെ അടിസ്ഥാനമാക്കിയുള്ളത്.മൊബൈല്‍ ക്യാമറയെന്താ കുടുംബത്തില്‍ പിറന്നതല്ലേ.എന്നാല്‍ കേട്ടോളൂ ഒരു പ്രൊഫഷണല്‍ വര്‍ക്കിനു മാത്രമേ SLRന്‍റെ ആവശ്യം വരുന്നുള്ളൂ.DSLR കയ്യിലുള്ള എല്ലാവരും ഫോട്ടോഗ്രാഫര്‍ ആകുന്നില്ല.അങ്ങനെയെങ്കില്‍ സിനിമാ നടന്‍ മമ്മൂട്ടിയായിരിക്കും കേരളത്തിലെ ഏറ്റവും മികച്ച ഫോട്ടോഗ്രഫെര്‍.കാരണം,ഏറ്റവും കൂടുതല്‍ ക്യാമറ കളക്ഷനുള്ളത് മൂപ്പരുടെ കയ്യിലാണത്രെ.പുള്ളിക്കാരന് അതൊരു ഹോബി മാത്രം.അവര്‍ ക്യാമറ മുതലാളിമാര്‍ മാത്രമാണ്.(ഫാന്‍സുകാര്‍ വാളെടുക്കണ്ട,ഉദാഹരണത്തിനു കാച്ചിയതാ)
             അവസാന കണക്കുകള്‍ വച്ചു നോക്കുമ്പോള്‍ MP 3/MP3 പ്ലയറിനെ സ്മാര്‍ട്ട്ഫോണുകള്‍  വിഴുങ്ങിയതു പോലെ  P&S ക്യാമറ വിപണിയെയും മൊബൈല്‍ ക്യാമറകള്‍ കീഴടക്കിയെന്നാണ് കേള്‍ക്കുന്നത്.ചുരുങ്ങിയ കാലത്തിനുള്ളില്‍ അവ പ്രകടനം മെച്ചപ്പെടുത്തി.ക്യാമറയുടെ പ്രധാന ഭാഗമായ സെന്‍സറിനു വലിപ്പം കൂടി.ഫീച്ചേഴ്സ് കൂടി.ഇപ്പോഴും കൂടിക്കൊണ്ടിരുക്കുന്നു. ഈ വര്ഷം ആദ്യ പാദത്തില്‍ ഇറങ്ങിയ  ഏതു സ്മാര്‍ട്ട് ഫോണിലും ഫിറ്റു ചെയ്യാവുന്ന 90 ശതമാനത്തോളം മാനുവല്‍ സെറ്റിംഗ്സ് ഉള്ള  സോണിയുടെ DSC QX-100 അറ്റാച്ച്മെന്റ് ലെന്‍സുകള്‍ P&S ക്യാമറകളുടെ ശവപ്പെട്ടിയിലെ അവസാനത്തെ ആണിയാണെന്നു പറയാം.ദീപിക പദുക്കോണെ ചോദിച്ചതു പോലെ ഇതില്‍ കോള്‍ ചെയ്യാന്‍ കഴിയുമോ എന്നു ചോദിക്കേണ്ട അവസ്ഥയായി.  Samsung,Sony,HTC,IphoneNokia.. തുടങ്ങിയ ഇന്നു വിപണിയിലുള്ള എല്ലാം പ്രബലര്‍ തന്നെ.
           24 മണിക്കൂറും സാധ്യമായ ഫോട്ടോഗ്രാഫി.കൊണ്ടു നടക്കാനും കാര്യമായ കണ്ഫ്യൂഷനൊന്നും ഇല്ലാതെ ഒരൊറ്റ കിക്കിലൂടെ  മോശമല്ലാത്ത സ്നാപ്സുകളെടുക്കാനും എളുപ്പം.ഈ കാരണങ്ങള്‍ കൊണ്ടു  ഇതില്‍ ആകൃഷ്ടരാകുന്നവരാണു പലരും. പ്രീ സെറ്റു മോഡു(വ്യത്യസ്ത സാഹചര്യങ്ങള്‍ക്കനുസരിച്ച് സ്വയം എക്സ്പോഷറും ഫോക്കസിങ്ങും  ക്രമീകരിക്കുന്ന  ഓട്ടോമാറ്റിക് മോഡുകള്‍)കളാണ് ഇതിലെ ഫോട്ടോഗ്രാഫി എളുപ്പമാക്കുന്നത്.
            മൊബൈല്‍ ക്യാമറ എങ്ങനെ കൈകാര്യം ചെയ്യണമെന്നു എനിക്കറിയാവുന്ന രീതിയില്‍ ഇവിടെ പറയാം.കടുകട്ടിയെന്നു തോന്നുന്ന തിയറികളും കണക്കുകളും ഇല്ലാത്തതിനാല്‍ വായന സുഗമാമാവുമെന്നു പ്രതീക്ഷിക്കുന്നു.

                                              Geotagging

                  GPSന്‍റെ സാധ്യതകളുപയോഗിച്ചു എടുത്ത ചിത്രത്തിന്‍റെ ലൊക്കേഷനും താപനിലകള്‍ അറിയാനും മാപ്പുകളിലും മറ്റും പിന്‍ ചെയ്യാനും സഹായിക്കുന്നു.

                                              Landscape

 പ്രകൃതിരമണീയമായതും ചക്രവാളത്തിന്റെയും കടല്‍പരപ്പുകളുടെയും ചിത്രങ്ങളെടുക്കുന്നതിന്.

                                               Fireworks

ഉത്സവങ്ങളിലൊക്കെ കരിമരുന്ന്  ആകാശത്തു വിടരുന്നതു കണ്ടിട്ടില്ലേ.പൂ പോലെ.അതു  പകര്‍ത്താന്‍ യോജിച്ച മോഡ്.സ്ലോ ഷട്ടര്‍ ആയതിനാല്‍ വെള്ളച്ചാട്ടത്തിന്റെയും motion blur photographyക്കും അനുയോജിച്ചതാണ്.

                                               Sports

അതിവേഗത്തിലുള്ള ഷോട്ടുകളെടുക്കാന്‍ സഹായിക്കുന്ന എക്സ്പോഷര്‍.

                                               Burst

Speed photographyക്കു വേണ്ടിയുള്ളത്.ഒരൊറ്റ ക്ലിക്ക് അമര്‍ത്തിപ്പിടിച്ചിരുന്നാല്‍  'ചക' 'ചക' 'ചക' എന്നു ക്യാമറ സ്വയം ചിത്രങ്ങളെടുത്തു കൊള്ളും.ഒരു സെക്കന്‍ഡില്‍ 10 ഫോട്ടോകളെടുക്കുന്ന ഫോണ്‍  വരെ ഇപ്പോള്‍ മാര്‍ക്കറ്റിലുണ്ട്

                                               Image stabilization

Zoom ചെയ്തു ചിത്രങ്ങളെടുക്കുമ്പോള്‍ ഷേക്ക്‌ ആയി വൃത്തികേടാവാതിരിക്കാന്‍ ഈ സാങ്കേതികവിദ്യ സഹായിക്കുന്നു.

                                               Portrait

 

മനുഷ്യരുടെയും മൃഗങ്ങളുടെയും ഭാവങ്ങള്‍ പകര്‍ത്താന്‍ ഈ മോഡ് സഹായിക്കുന്നു.മുഖത്തിനു ആവശ്യമായ skin tone  നല്‍കാനും ബാക്ഗ്രൌണ്ട് ബ്ലര്‍ ആക്കാനും ഇതിന്‍റെ സോഫ്റ്റ്‌വെയര്‍ സ്വയം ക്രമീകരിക്കുന്നു.

                                               Face detection

 

ഫോട്ടോയെടുക്കുന്ന സബ്ജെക്റ്റില്‍ ആളുകള്‍ ഉണ്ടെങ്കില്‍ ഓട്ടോമാറ്റിക്കായി ക്യാമറ സ്വയം അവരുടെ മുഖത്തേക്ക് ഫോക്കസ് ചെയ്യുന്നു.ഈ അവസരത്തില്‍ ഓട്ടോഫോക്കസ് മറ്റു ഭാഗങ്ങക്കു പ്രാധാന്യം കൊടുക്കില്ല.

                                               Smile detection

 

ഈ മോഡില്‍ വെച്ചു ക്യാമറക്കു മുന്നില്‍ നിന്നു ചിരിച്ചാല്‍ ക്യാമറ സ്വയം ഫോട്ടോയെടുക്കുന്നതാണ്.പുഞ്ചിരി/സാദാ ചിരി/സിനിമാസ്കോപ്പ് ചിരി എന്നിവ ആവശ്യാനുസരണം തെരഞ്ഞെടുക്കാം. ഗൌരവക്കാരുടെ ചിത്രങ്ങളെടുക്കാന്‍ ശ്രമിച്ചു പരാജയപ്പെട്ടാല്‍ എന്നെയോ ക്യാമറയേയോ കുറ്റം പറയരുത്.

                                               Image recognize

 

ആരുടെയെങ്കിലും ചിത്രം  മൊബൈലിലെടുത്തു   Image recognizeഇല്‍ റെജിസ്റ്റെര്‍ ചെയ്യുക.പിന്നെ അയാള്‍/അവള്‍ ഫ്രൈമില്‍ വന്നാല്‍ ഓട്ടോമാറ്റിക്കായി ക്യാമറ അവരുടെ മുഖത്തേക്ക് ഫോക്കസ് ചെയ്യും.

                                               HDR

 

ഫ്രൈമിലെ എല്ലാ ഭാഗങ്ങളിലും ഒരേ പ്രകാശവിന്യാസവും ഇരുണ്ടിരിക്കുന്ന ഭാഗങ്ങള്‍ കൂടുതല്‍ വെളിച്ചമുള്ളതാക്കാനും ക്യാമറയെ സഹായിക്കുന്ന സാങ്കേതികവിദ്യ.

                                               Object tracking

ഫ്രൈമിലെ ഒരു ഒബ്ജെക്റ്റിനെ ഫോക്കസ് ലോക്കു ചെയ്തു കഴിഞ്ഞാല്‍ ആ വസ്തു/മൃഗം ഫ്രൈമില്‍ നിന്നും പുറത്തു പോകും വരെ ഫോക്കസിംഗ് അതിനു മേലുണ്ടായിരിക്കും.പറക്കുന്ന പക്ഷികളുടെയും ഇളകിക്കൊണ്ടിരിക്കുന്നതിന്റെയുമൊക്കെ ചിത്രങ്ങളെടുക്കാന്‍ ഇതു സഹായിക്കുന്നു.

                                               Red eye reduction

ഫ്ലാഷ് അടിച്ചു ഫോട്ടോയെടുക്കുമ്പോള്‍(പ്രത്യേകിച്ചു രാത്രിയില്‍) പ്രേതങ്ങളെ  പോലെ  കണ്ണില്‍ കാണുന്ന ചെമന്ന വൃത്തം.ഇതില്ലാതക്കാന്‍ ഈ സാങ്കേതികവിദ്യ സഹായിക്കുന്നു.

                                               Sweep panorama

Landscapeല്‍ നീളത്തില്‍ ചിത്രമെടുക്കുന്നതിന്. പനോരമയില്‍ 120/180/360 digree എന്നിവ  തെരഞ്ഞെടുക്കാം.ഉദ്ദേശിക്കുന്ന ചിത്രം മനസ്സില്‍ കണ്ടു സീനിന്റെ ആരംഭത്തില്‍ ഷട്ടര്‍ ബട്ടന്‍ അമര്‍ത്തിക്കൊണ്ടു  ഒരു വശത്തേക്ക് sweep ചെയ്യുക(മെല്ലെ ക്യാമറയും കൊണ്ടു തിരിയുക).പനോരമ ചിത്രങ്ങളിലെ ന്യൂനതകളായ എക്സ്പോഷറും കൃത്യമായ ഫോക്കസിങ്ങും പരിഹരിച്ചുകൊണ്ട് phenomenal panorama എന്ന പുതിയ രൂപം Iphone 5Sല്‍  ഇണക്കിയിട്ടുണ്ട്.

                                               Touch focus/ Touch capture

ഇതു പ്രത്യേകിച്ചു പറയേണ്ട കാര്യമുണ്ടോ?

 

                                              Exposure compensation

ഒരു ചിത്രമെടുക്കാനൊരുങ്ങുമ്പോള്‍ ഡിസ്പ്ലേയില്‍ വെളിച്ചം കുറവോ കൂടുതലോ കണ്ടാല്‍ ഈ ഒപ്ഷന്‍ ഉപയോഗിച്ചു എക്സ്പോഷര്‍ (ചിത്രത്തിനു ആവശ്യമായ ഷട്ടര്‍ സ്പീഡ്,അപ്പെര്‍ച്ചര്‍ ഇവ രണ്ടും  ചേര്‍ന്നത്) നിയന്ത്രിക്കാവുന്നതാണ്.

                                               ISO control

 

രാതിയില്‍ എടുക്കുന്ന ചിത്രങ്ങള്‍ ബ്ലര്‍ ആവുകയാണെന്നു കണ്ടാല്‍ ISO സ്പീഡ് കൂട്ടുക.പക്ഷെ (100,200,400...1600.3200) ഇങ്ങനെ കൂടുന്നതിനനുസൃതമായി ചിത്രത്തില്‍ ഒരു മൊരിച്ചില്‍ പോലെ പല പല കളര്‍ ഡോട്ടുകള്‍ (Noise)   കാണും.എന്നാലും ചിത്രങ്ങള്‍ ഷേക്ക്‌ ആവാതെ കിട്ടും.

                                               Noise reduction

ISO കൂട്ടിയെടുക്കുന്ന ചിത്രങ്ങളിലെ Noise വേര്‍തിരിച്ചെടുക്കുന്ന സാങ്കേതിക വിദ്യ.പക്ഷെ ഇതോടൊപ്പം ചിത്രത്തിലെ കുറച്ചു ഡീറ്റെയില്‍സും അതങ്ങു കൂടെ കൊണ്ടു പോകും.

                                               White balance

 

റ്റ്യൂബ് ലൈറ്റിന്റെ വെളിച്ചത്തിലും നട്ടുച്ചയ്ക്കും മഞ്ഞിലും മേഘാവൃത സമയത്തും സൂര്യോദയ/സൂര്യാസ്തമയ സമയത്തുമൊക്കെ പ്രകൃതിയില്‍ വരുന്ന പ്രകാശവ്യതിയാനത്തിനനുസരിച്ച് പശ്ചാത്തലത്തിലെ വെളിച്ചം ക്രമീകരിക്കുന്നതിന്.ഒരേ സീന്‍ വ്യത്യസ്ത White balanceസുകളില്‍  എടുത്താല്‍ ഇതിലെ മാറ്റങ്ങള്‍ തിരിച്ചറിയാം.

                                          ചില ടിപ്സുകള്‍.

                ഒരു വസ്തു മാത്രവും ചുറ്റുഭാഗം മുഴുവനും ഇരുണ്ടിരിക്കുന്ന ചിത്രങ്ങള്‍ കണ്ടിട്ടില്ലേ.അതെങ്ങെനെ എടുക്കാമെന്നു നോക്കാം.എടുക്കേണ്ട വസ്തു നല്ല വെളിച്ചമുള്ളിടത്തെക്കു വെക്കുക.ഇല്ലെങ്കില്‍ കൃത്രിമ വെളിച്ചം കൊടുക്കുകയുമാവാം.മൊബൈലില്‍ Metering mode എന്ന ഒപ്ഷന്‍ കാണാം.Spot metering അതില്‍ തെരഞ്ഞെടുക്കുക.ഇപ്പോള്‍ ഒബ്ജെക്റ്റിന്റെ ചുറ്റും നിറം മങ്ങിയതു ശ്രദ്ധിച്ചില്ലേ.ഒബ്ജെക്റ്റിനു വലിപ്പം കൂടുതലാണെങ്കില്‍ Center Weighted   തെരഞ്ഞെടുക്കാം.മുഴുവനും ഒരേ വെളിച്ചത്തില്‍ കിട്ടണമെങ്കില്‍ Multi  തെരഞ്ഞെടുക്കുക.വെളിച്ചം പതിക്കുന്ന ജനല്‍/റ്റ്യൂബ് ലൈറ്റ്/കമ്പ്യൂട്ടര്‍,മൊബൈല്‍ എന്നിവയുടെ മോണിട്ടര്‍ എന്നിവ Spot metering മാത്രമെടുക്കാനായി ഉപയോഗിക്കാം.

             രാത്രിയിലോ ഫോക്കസിംഗ് ബുദ്ധിമുട്ടേറിയ സമയത്തോ ആണെങ്കില്‍ Infinity  എന്ന ഫോക്കസിംഗ് മോഡ് തെരഞ്ഞെടുത്താല്‍  അങ്ങു അനന്തതയിലേക്കു ഫോക്കസ് പോകും.പിന്നെ ഫോക്കസിനു ചാഞ്ചാട്ടമുണ്ടാവില്ല .അതിനര്‍ത്ഥം  എല്ലാം ഫോക്കസില്‍ വരും എന്നല്ലകേട്ടോ.
   ലേഖനം അപൂര്‍ണ്ണമാണ്. ഫോട്ടോഗ്രഫി പുലികള്‍ക്കു വല്ല തിരുത്തലുകളും വേണമെന്നുണ്ടെങ്കില്‍ അറിയിക്കണം ട്ടോ.